رہ گئی رسمِ اذاں ، روحِ بلالى نہ رہى

 

رہ گئی رسمِ اذاں ، روحِ بلالى نہ رہى

(رمضان، تقویٰ اور دورِ حاضر کا مسلمان)

                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                               ابو مىمونہ

بلا شبہ ماہِ رمضان اور اس کا روزہ اللہ سبحانہ و تعالیٰ کی طرف سے امتِ محمدیہ پر ایک بہت بڑا فضل و کرم اور عظیم احسان ہے۔ یہ ایک عظیم الشان نعمتِ الٰہی اور نہایت اہم و عظیم عبادت ہے۔ یہ نفس کی تربیت، دل کی تطہیر اور کردار کی تعمیر کا مہینہ ہے۔ یہ روح کی بیداری، ضمیر کی صفائی اور کردار سازی کا الٰہی پروگرام ہے۔ یہ احتساب، اصلاح اور روحانی انقلاب کا مہینہ ہے۔ یہ ان شرائع و احکام میں سے ہے جو ہر زمانے اور ہر علاقے میں اہلِ ایمان کے لیے باعثِ سعادت و رحمت اور موجبِ مصلحت و منفعت رہا ہے۔

یہ برکتوں اور رحمتوں کا مہینہ ہے۔ کسی بھی مہینہ پر بركت كى  صفت اس طرح صادق نہیں آتی جیسے ماہِ رمضان کے بارے میں “برکت” کی صفت صادق آتی ہے؛ کیونکہ یہ صفت ہر پہلو سے اس پر منطبق ہوتی ہے۔ اور اگر برکت کی حقیقت “زیادتی اور نشوونما” ہے تو اس اعتبار سے رمضان وقتوں میں برکت ہے، اعمال میں برکت ہے اور اجر و ثواب میں برکت ہے۔

اور اسی برکت کے متعدد پہلوؤں میں سے ایک تقویٰ کا حصول ہے، جو بلا شبہ سب سے بڑی برکت ہے، اور روزے کے فرض کیے جانے کا بنیادی و اہم مقصد ہے، اس کی مشروعیت کی علت و حکمت اور اس کی روح و جوہر ہے۔ اسی وجہ سے اسے سابقہ امتوں پر بھی فرض کیا گیا۔ ارشادِ ربانی ہے:

﴿ يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِنْ قَبْلِكُمْ لَعَلَّكُمْ تَتَّقُونَ ﴾ (البقرہ: 183)
یعنی اے ایمان والو! تم پر روزہ فرض کیا گیا، جیسے تم سے پہلے لوگوں پر فرض کیا گیا تھا، تاکہ تم میں تقویٰ پیدا ہو۔

بے شک روزہ تقویٰ کے بڑے اسباب میں سے ہے، کیونکہ اس میں اللہ کے حکم کی تعمیل اور اس کی ممانعت سے اجتناب پایا جاتا ہے۔

روزے میں تقویٰ کے کئی پہلو شامل ہیں، مثلاً:

• روزہ دار اللہ کی حرام کردہ چیزوں، جیسے کھانا، پینا اور ازدواجی تعلق وغیرہ کو چھوڑ دیتا ہے، حالانکہ نفس ان کی طرف مائل ہوتا ہے۔ وہ یہ سب اللہ کی رضا کے لیے ترک کرتا ہے اور اس کے اجر کا امیدوار ہوتا ہے؛ یہ تقویٰ ہے۔

• روزہ میں صرف دن کو کھانا پینا چھوڑ دینا ہی مقصود نہیں، بلکہ گویا اللہ کو اپنے اوپر نگران بنانے کی مشق ہے۔ مومن کی پوری زندگی ایک طرح کی روزہ دار زندگی ہے۔ رمضان میں وقتی طور پر چند چیزوں کو چھوڑ کر انسان کو تربیت دی جاتی ہے کہ وہ ساری عمر ان چیزوں کو بھی چھوڑ دے جو اس کے رب کو ناپسند ہیں؛ یہ بھی تقویٰ ہے۔

• روزہ دار اپنے نفس کو اللہ تعالیٰ کی نگرانی کا عادی بناتا ہے۔ وہ قدرت رکھنے کے باوجود اپنی خواہش کو چھوڑ دیتا ہے، اس یقین کے ساتھ کہ اللہ اسے دیکھ رہا ہے؛ یہ بھی تقویٰ ہے۔

• روزہ شیطان کی گزرگاہوں کو تنگ کر دیتا ہے، کیونکہ وہ انسان میں خون کی طرح گردش کرتا ہے۔ روزے کے ذریعے اس کا اثر کمزور ہو جاتا ہے اور گناہوں میں کمی آتی ہے۔

• عام طور پر روزہ دار کی اطاعت و عبادت میں اضافہ ہو جاتا ہے، اور اطاعتیں تقویٰ کی صفات میں سے ہیں۔

• جب مالدار شخص بھوک کی تکلیف کو محسوس کرتا ہے تو اس کے اندر فقراء و مساکین کے ساتھ ہمدردی اور مواسات کا جذبہ پیدا ہوتا ہے، اور یہ بھی تقویٰ کی ایک نمایاں صفت ہے۔

سطورِ بالا میں جو کچھ پیش کیا گیا وہ تقویٰ کا صرف ایک پہلو ہے اور رمضان کے تقاضوں کا صرف ایک جانب ہے، جو احکام کی تعمیل سے متعلق ہے۔ لیکن تقویٰ کا ایک دوسرا پہلو بھی ہے اور رمضان کے تقاضوں کا ایک دوسرا جانب بھی ہے، جو محرمات اور گناہوں سے بچنا ہے، جس کی طرف ذیل کی احادیث میں صراحت کی گئی ہے۔

عن أبي هريرة رضي الله عنه أن النبيَّ صلى الله عليه وسلم قال: ((مَن لم يَدَعْ قول الزُّور والعملَ به ، فليس للهِ حاجةٌ  فى أن يَدَعَ طعامه وشرابه))؛ (بخاري/1903،  ابوداؤد/2362، ترمذى /707 و ابن خزىمہ /1995) حضرت ابو ہرىرہ كى رواىت ہے كہ نبى كرىم نے ارشاد فرماىا: جوشخص جھوٹ بولنا اور اس  پر عمل  كرنا نہ چھوڑے تو اللہ تعالى كو اس  كى كوئى ضرورت نہىں ہے كہ وہ اپنا كھانا پىنا چھوڑ دے۔

عن ابى ھرىرة قال : قال رسول اللہ : ربَّ صائمٍ ليسَ لَه من صيامِه إلَّا الجوعُ وربَّ قائمٍ ليسَ لَه من قيامِه إلَّا السَّهرُ(حسن صحيح, صحيح  ابن ماجہ/1380، نسائى  در سنن كبرى/3249، ابن ماجہ/1690،  الفاظ انہىں دونوں كے ہىں ، احمد/9683 معمولى اختلاف كے ساتھ ) حضرت ابو ہرىرہ كا كہنا ہے كہ آپ نے فرماىا:بہت سارے روزہ دار اىسے ہىں جن كو ان كے روزہ سے بھوك كے سوا كچھ نہىں ملتا ہے اور بہت سارے رات مىں قىام كرنے والے اىسے ہىں جن كو ان كے قىام سے شب بىدارى كے علاوہ كچھ نہىں حاصل ہوتا ہے۔

عن ابى ھرىرة قال : قال رسول اللہ :  ليس الصيامُ من الأكلِ و الشربِ ، إنما الصيامُ من اللَّغوِ و الرفَثِ ، فإن سابَّك أحدٌ أو جهِل عليك فقل : إني صائمٌ ، إني صائمٌ لا تُسابِّ و أنت صائمٌ ، وفي رواية: فإن سابَّك أحدٌ فقل : إني صائمٌ ، وإن كنتَ قائمًا فاجْلِسْ(صحىح الترغىب /1082، علامہ البانى كے نزدىك صحىح ہے، ابن خزىمہ/1996، ابن حبان /3479، حاكم/1570)  حضرت ابو ہرىرہ كى رواىت ہے ان كا كہنا ہے كہ رسول كرىم نے فرماىا: روزہ صرف كھانے و پىنے كو چھوڑنے كا نام نہىں ہے بلكہ روزہ تو وہ ہے جو بىہودہ   اور لا ىعنى باتوں اور گالى گلوج سے پاك ہو ۔ اگر كوئى تم كو گالى دے ىا تمہارے ساتھ جہالت اور بىوقوفى سے پىش آئے تو اس سے كہو كہ مىں روزہ ہوں ، مىں روزہ ہوں ۔ تم روزہ كى حالت مىں قطعا گالى مت دو۔ اىك اور رواىت مىں ہے: اگر تم كو كوئى گالى دے تو كہو كہ مىں روزہ دار ہوں ، اور اگر تم كھڑے ہو تو بىٹھ جاؤ۔

سبحان اللہ! کتنی عمدہ ، شاندار ، خوبصورت اور قیمتی تعلیمات ہیں جو نہ صرف بڑے گناہوں سے روکتی ہیں بلکہ بیہودہ و بے کار باتوں تک سے منع کرتی ہیں۔ دراصل حقیقی روزہ یہی ہے اور یہی تقویٰ کی علامت ہے۔ اگر کوئی ان پر عمل کرے تو اس کے اندر تقویٰ ضرور پیدا ہوگا بلکہ اس میں اضافہ ہوگا۔

معلوم ہوا کہ رمضان کا ایک دوسرا تقاضا بھی ہے اور تقویٰ کا ایک دوسرا پہلو بھی، جو گناہوں سے بچنا اور ان سے دور رہنا ہے۔ جب یہ دونوں ایک ساتھ جمع ہوں گے تبھی تقویٰ حاصل ہوگا، ورنہ نہیں۔ کیونکہ تقویٰ کے حصول کے لیے جہاں ایک طرف احکام کی تعمیل و تطبیق ضروری ہے، وہیں دوسری طرف گناہوں سے اجتناب بھی لازمی ہے۔

اب آئیے رمضان کے تقاضوں اور تقویٰ کے اس معیار کی روشنی میں دورِ حاضر کے مسلمانوں کا جائزہ لیتے ہیں اور دیکھتے ہیں کہ کیا وہ اس معیار پر پورا اترتے ہیں؟

یقیناً جب رمضان کا مبارک مہینہ آتا ہے تو عموماً مسلمانوں میں خوشی کی لہر دوڑ جاتی ہے۔ وہ ایک دوسرے کو مبارکباد دیتے ہیں، روحانیت میں اضافہ ہوتا ہے، نمازوں کی پابندی بڑھتی ہے، مساجد آباد ہو جاتی ہیں، فضائیں تلاوتِ قرآن سے معطر ہو جاتی ہیں، سحری و افطاری کا روحانی نظام قائم ہوتا ہے، لوگ صدقہ و خیرات کرتے ہیں اور دینی مجالس میں شرکت کا اہتمام کرتے ہیں وغىرہ ۔ یعنی وہ احکام کی تعمیل کے ذریعے تقویٰ کے ایک پہلو پر بخوبی عمل کرتے ہیں۔

لیکن دوسری طرف یہ بھی ایک تلخ حقیقت ہے کہ مسلمانوں کی ایک بڑی تعداد بلا عذرِ شرعی روزہ ترک کر دیتی ہے۔ اس کے علاوہ بہت سے لوگ روزہ رکھتے ہوئے بھی جھوٹ، غیبت، چغلی، بہتان، خیانت، وعدہ خلافی، ظلم، حرام کمائی اور دھوکہ دہی جیسے گناہوں میں مبتلا رہتے ہیں۔ نگاہیں بے قابو رہتی ہیں، معاملات میں دیانت و انصاف کا فقدان ہوتا ہے۔آج کا دور مادّیت، مفاد پرستی اور نفس پرستی کا دور ہے۔ سوشل میڈیا کی چکاچوند، سیاسی انتشار، معاشی دباؤ اور اخلاقی بے سمتی نے مسلمان کے باطن کو کمزور کر دیا ہے۔

دورِ حاضر کا مسلمان اس وقت جس بحران سے گزر رہا ہے وہ صرف سیاسی یا معاشی نہیں، بلکہ اخلاقی اور روحانی بحران ہے۔ اعتماد کا فقدان، وعدہ خلافی، بے انصافی اور خود غرضی ہمارے اجتماعی مزاج کا حصہ بنتی جا رہی ہے۔

یوں رمضان کا دوسرا تقاضا اور تقویٰ کا دوسرا پہلو نظر انداز ہو جاتا ہے اور اس میں شدید غفلت برتی جاتی ہے۔

یہ ایک کھلی ہوئی حقیقت ہے جس کا انکار ممکن نہیں۔ گویا روزہ ایک رسم بن گیا ہے اور اکثر لوگ اسے عبادت کے بجائے عادت کے طور پر رکھتے ہیں، جو روحِ تقویٰ سے خالی ہوتا ہے۔ بقول علامہ اقبال :

رہ گئی رسمِ اذاں، روحِ بلالی نہ رہی    *****فلسفہ رہ گیا، تلقینِ غزالی نہ رہی

معمولى تبدىلى كے ساتھ گوىا:

رہ گئی رسمِ روزہ، روحِ تقویٰ نہ رہا

یہی وجہ ہے کہ سالہا سال روزہ رکھنے کے باوجود بہت سے مسلمانوں میں تقویٰ پیدا نہیں ہوتا۔ ورنہ روزہ تقویٰ پیدا کرنے کا سب سے بڑا ذریعہ ہے۔ یہ اللہ تعالیٰ کا فرمان ہے، جس کے معاذ اللہ  غلط یا نامکمل ہونے کا سوال ہی پیدا نہیں ہوتا۔ىہ اللہ تعالى كا وعدہ ہے جو سدا سچ ہوتا ہے اور وہ كبھى وعدہ خلافى نہىں كرتا  ہے ۔

ان سب سے واضح ہے کہ ہمارے معاشرے میں رمضان کی روح کمزور ہوتی جا رہی ہے۔ مساجد آباد ہوتی ہیں مگر دل ویران رہتے ہیں۔ تلاوت کی صدائیں بلند ہوتی ہیں مگر قرآن کے احکام زندگی میں نافذ نہیں ہوتے۔ سحر و افطار کے دسترخوان رنگین ہوتے ہیں مگر تقویٰ کی روشنی مدھم رہتی ہے۔ یوں روزہ ایک موسمی عبادت اور معاشرتی روایت بن کر رہ جاتا ہے۔

حقیقی رمضان وہ ہے جو انسان کو بدل دے؛ جو تاجر کو دیانت دار، حاکم کو عادل، استاد کو مخلص اور نوجوان کو باحیا بنا دے؛ جو زبان کو سچائی کا عادی اور دل کو خشیتِ الٰہی سے معمور کر دے؛ جو ہمیں صرف عبادت گزار نہیں بلکہ باکردار مسلمان بنا دے۔ تقویٰ وقتی کیفیت نہیں بلکہ مستقل طرزِ حیات کا نام ہے—ایسا شعور جو رمضان کے بعد بھی زندہ رہے۔

لہٰذا مسلمانوں کے لیے یہ جاننا ضروری ہے کہ حصولِ تقویٰ کے لیے صرف احکام پر عمل کافی نہیں بلکہ گناہوں کو چھوڑنا بھی ضروری ہے۔ رمضان كے تقاضوں كو بروئے كار لانا اور  تقویٰ کے دونوں پہلوؤں پر عمل کرنا ہی روزے کو بامعنی اور حقیقی بناتا ہے۔

آج ضرورت اس بات کی ہے کہ ہم رمضان کو رسم نہ بننے دىں ، اس كو  محض تہوار یا موسمی عبادت نہ سمجھیں بلکہ اسے اپنی زندگی کا نقطۂ انقلاب بنائیں۔ اپنے نفس کو قابو میں لائیں، اپنی ترجیحات کو درست کریں، اور تقویٰ کو اپنی شناخت بنائیں۔  تقویٰ کو وقتی کیفیت کے بجائے دائمی صفت بنانے کی کوشش کریں۔ ہماری مساجد آباد ہوں، مگر اس سے بڑھ کر ہمارے دل آباد ہوں؛ ہماری تلاوتیں بڑھیں اور ہمارے اعمال بھی سنوریں۔

اگر رمضان گزر جائے اور ہمارے اندر تقوى اور  کوئی اخلاقی تبدیلی نہ آئے تو ہمیں سنجیدگی سے سوچنا ہوگا کہ ہم نے اس مہینے کی برکتوں سے کیا حاصل کیا؟

ضرورت اس امر کی ہے کہ ہم رمضان کے ذریعے حقیقی تقویٰ پیدا کریں، تاکہ ہماری عبادتیں زندہ ہوں، ہمارے کردار میں ایمانی روح پیدا ہو اور ہمارا معاشرہ واقعی اسلامی اقدار کا آئینہ دار بن سکے۔ تبھی ہم دورِ حاضر کے چیلنجز کا سامنا کر سکیں گے اور ایک باوقار، باکردار اور باعمل مسلمان کے طور پر ابھر سکیں گے۔

آخر میں ہمیں یہ عہد کرنا ہوگا کہ رمضان ہمارے لیے محض عبادات کا موسم نہیں بلکہ کردار سازی کا انقلاب بنے۔ ہم اپنے نفس کا محاسبہ کریں، اپنی کمزوریوں کو پہچانیں اور تقویٰ کو اپنی زندگی کا مستقل شعار بنائیں۔ اگر اس رمضان ہم نے اپنے اندر سچائی، دیانت، خوفِ خدا اور گناہوں سے حقیقی اجتناب پیدا کر لیا تو یہی ہماری سب سے بڑی کامیابی ہوگی؛ ورنہ اندیشہ ہے کہ ایک اور رمضان گزر جائے گا اور ہم ویسے ہی رہ جائیں گے جیسے پہلے تھے۔

و ما علىنا الا البلاغ و آخر دعوانا ان الحمد للہ رب العالمىن۔